Eze 15 | ZomZIV | STEP | TOPA thu kei tungah hong tunga:

Ezekiel 15

Jerusalem, Kimanna Neilo Lenggui

1 TOPA thu kei tungah hong tunga: 2 “Mihing tapa aw, tu laka singkung hiang khatpeuh sangin lenggui hiang bangci hoih zawk ahi hiam? 3 Sing na khatpeuh a bawl dingin lenggui kila ngei ahi hiam? Vankhai nadingin vankhai in bawl ngei uh ahi hiam? 4 Mei kuantawhna-in meikhuk ah a kikhul khit ciangin a mongtuak kangin a laizang a kangvom hi. Tua pen na khatpeuhin kimang ahi hiam? 5 Bangmah a cih ma-in kimanna nei lo ahileh mei ah kangin a vom khit ciangin banga kimang peuhmah ding ahi hiam? ^a

6 “Tua ahi ciangin Thupipen TOPA gen hih ahi hi: Keimah in mei tawh nadingin tulaka singte lakah lenggui sing kong piak bangin Jerusalem a teng mite ka bawl ding hi. 7 Amaute ka lang-et ding hi. Mei sung panin a suakta kha uh zongin mei in a hul veve ding hi. Amaute ka lang-et ciangin keimah TOPA ka hilam na thei ding uh hi. 8 Amaute muanhuai lo uh ahi manin a gam uh gamkhing ka suaksak ding hi, Thupipen TOPA in cikhia hi,” hong ci hi.